Ef þú ert að leita þér að einhverju ótrúlega ljúffengu sælgæti sem er samt ekki óhollt þá skaltu endilega smella í þessar hollu og próteinríku browniekúlur. Þær eru algjörlega sykurlausar en bragðast samt eins og alvöru browniekúlur.

Þær samanstanda að mestu af kjúklingabaunum og döðlum sem gerir áferðina á þeim alveg einstaklega djúsí og mjúka svo þær algjörlega bráðna í munninum.

Þessar próteinríku browniekúlur eru einnig glúteinlausar þar sem þær innihalda kókoshveiti.

Hnetusmjörið kemur með ómótstæðilegt bragð og próteinduftið eykur svo próteinmagnið ennþá frekar í þessum ljúffengu kúlum.

Að sjálfsögðu innihalda þær líka hreint kakóduft frá Nóa Síríus og eru hjúpaðar í sykurlausa rjómasúkkulaðinu sem er alveg svakalega gott!

Það er upplagt að smella í þessar kúlur og geyma þær svo inn í ísskáp eða frystinum, fá sér svo nokkrar þegar manni langar í eitthvað sætt og gott.

Próteinríkar browniekúlur

• 200 g döðlur
• 300 g kjúklingabaunir
• 60 g kókoshveiti
• 40 g hreint sælkerabaksturs kakóduft
• 25 g súkkulaðipróteinduft
• 50 g hnetusmjör
• 2-3 msk möndlumjólk (eða eftir því sem þarf, mismunandi eftir því hversu blautar döðlurnar eru)
• 300 g sykurlaust rjómasúkkulaði frá Nóa Síríus

Aðferð:

1. Setjið döðlurnar í skál og hellið sjóðandi heitu vatni yfir þær og leyfið þeim að standa í a.m.k. 5 mín í heita vatninu.
2. Hellið vökvanum af kjúklingabaununum.
3. Setjið allt nema sykurlausa rjómasúkkulaðið ofan í matvinnsluvél og blandið þar til allt hefur maukast.
4. Útbúið kúlur úr deiginu úr 1 msk af deigi.
5. Bræðið súkkulaðið yfir vatnsbaði og hjúpið hverja kúlu, látið stirðna inn í ísskáp.

Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben

Fylgistu með á Instagram!

Fylgstu með á Tiktok!

Njótið vel!

Ykkar